Депутат Момбеков саламаттыкты сактоо министрине: “Жогорку Кеңешке келгенде келесоо болуп калат экенсиз, башка жакта сагызгандай сайрайсыз”

Бүгүн, 15-июнда парламентте “Дары каражаттары жөнүндө” мыйзам долбоору экинчи окууда каралып жатканда КСДП фракциясынан депутат Рыскелди Момбеков саламаттыкты сактоо министри Талантбек Батыралиевге “Жогорку Кеңешке келгенде келесоо болуп калат экенсиз, башка жакта сагызгандай сайрайсыз”, - деп айтты.

Депутат дары-дармектерди, медициналык каражаттарды жана жабдууларды улуттук валютада сатып алуу зарылдыгын белгиледи. “Дары-дармектерди каттоодо доллар менен төлөнүп жатат. Эмне үчүн сом менен төлөнбөйт? Тийиштүү комитетте мыйзам долбоору каралып жатканда улуттук валюта менен каттоодон өтсүн деген чечим киргизгенбиз. Эмне үчүн сунуш кирген эмес?” - деди ал. Ошондой эле мыйзам долбоор “чийки” экенин кошумчалады.

Батыралиев чет мамлекеттер менен түзүлгөн келишимдин негизинде сатып алуулар доллар менен төлөнө турганын, ал эми комитет сунуштаган чечим боюнча жазуу түрүндө жооп беришкенин билдирди.

Автор: Жылдыз Джускембаева