СУПЕРСТАН: "Күйөөм карегим менен тең айланат, бирок мен аны сүйбөйм"

SUPER.KG порталынын "Суперстан" бөлүмүндө "Кыздар, күйөөӊөрдү сүйөсүӊөрбү?" деген тема талкууга алынууда.

Темадагы автордун билдирүүсү: "Сүйлөшүп үйлөнгөнбүз. Жашаганыбызга 2 гана жыл болду. Башында эле сүйгөн эмесмин. Жактырган болсом да, сүйүү эмес. "Сүйүү никеден кийин башталат, сен сүйгөнгө эмес, сени сүйгөнгө бар" деген сөздөр таасир этип турмушка чыккам (мен акылсызмын). Анан "жакпаса кетип калам, балам болот" деген да ойдо элем. Балалуу болдук. Жаным эң таттуу сүйгүнчүк. Ал эми ажырашып кетиш мен ойлогондой оңой болбой калды. Ширин баламды алтындай болгон атасынын көз алдында өстүрбөй, андан ушул бакытты уурдап кетүү кыйын. Мейли кандай жолуктуруп, ага калтырып турбайын, мейли чоңойгондо атасына барышына каршы болбоюн. Бирок атасына баласынан артык эч ким жок. Ал менен калтыра албайм. Сүйүүсүнө ишенсем да, мен каалагандай багып, тарбияланышына ишене албайм. Атасы жөнүндө айтсам, ал элден өзгөчө жакшы. Эч жаман адаты жок, менин карегим менен тең айланат. Бизди эч нерседен кем кылбайт. Анын жашоосунун маңызы - биз. Бирок айткым келгени, ал менен ушунчалык зеригем. Экөөбүздүн оюбуз, ой жүгүртүү, кыялыбыз эки башка планетадан келген адамдардай, ал такыр кыялданбайт. Мен "каалоо" деген менен жашасам, ага "керек" деген сөз маанилүү. Мисалы, акча табыш керек, аялды багыш керек, жумушка барыш керек жана сүйүш керек. Сезим жок болсо да, баары программаланган техника сыяктуу. Ошол үчүн анын сүйөм деген сөзү да жүрөгүмө жетпейт. Анткени жүрөктөн чыкпай эле, сүйөм деп айтып коюш керек деп айтып жаткандай. Мурун үй-бүлөмдө күйөөм мени башкарса, бардыгыбыз анын айтканы менен болсок деп тилечү элем. Тилекке каршы, акыркы чечим менде. Кыздар, күйөөӊөрдү сүйөсүӊөрбү?

Темадагы билдирүүлөрдөн:

"Жолдошум өжөрлүккө салып эле үйлөнүп алган. "Жигитим бар, алыс жүр" десем, сүйүү никеден кийин башталат деп көгөрүп, ата-энесин ортого салып үйлөндү. Элестеткиле, турмушка чыкканча бир да жолу көргөн эмесмин. Ал коңшу айылдан болгондуктан мени көргөн экен. Кош бойлуу болгончо тамакты өзү жасап, көзүмдү карачу. Азыр "каякка барат элең?" деп көөп калган учуру. Жигитимди эстесем "сен аны сүйбөйт деле болчусуң, жөн эле эркелеп уруш чыгарып жатасың" деп кутулат. Турмушка чыгарда "тойду токтот, каалаган кызыңды таап берейин" деп телефондон жалынып ыйлаган болчумун. Азыр болсо "айдай чырайыңды иттей мүнөзүң бузат" дей берет. Менде жооп даяр да "мени албаңыз деп айтпадым беле" деп коём".

"Сүйлөшпөй эле үйлөнгөнбүз. Бир айылдан болгондуктан бири-бирибизди таанычубуз. Сүйүү никеден кийин деген сөзгө ишенем. Күйөөм жылуу мамилеси, бал тили, тамашакөйлүгү менен мени сүйдүрүп алды. Кудайым, ушул бактымдан айыра көрбө, карылыктын доорун бирге көрсөк деп тилейм".

Талкууга кошулгуңуз келсе, бул жакка кириңиз.