19-июнда Алмазбек Атамбаев Путиндин чакыруусу менен Орусияга барат

Президент Алмазбек Атамбаев мамлекеттик иш сапары менен 19-июнда Орусияга барат. Бул тууралу бүгүн, 16-июнда маалымат жыйынында президенттик аппараттын тышкы саясат бөлүмүнүн башчысы Айзада Субакожоева билдирди.

Анын айтымында, Атамбаев Орусиянын президенти Владимир Путиндин чакыруусу менен барат. "Иш сапар 19-июндан 24-июнга чейин созулат. Президент Кыргыз-Орусия дипломатиялык мамилесине 25 жыл толгондугуна байланыштуу барат. Анда эки өлкөнүн стратегиялык мүнөздөгү кызматташуусу талкууланат. Ошондой эле ЕАЭБ алкагында дагы сөз болот. 20-июнда Орусияда өтчү Кыргыз маданият күндөрүнө катышат", - деди Субакожоева.

Мындан тышкары Атамбаевдин Орусияда жашап жана иштеп жаткан Кыргыз жарандары менен жолугушуусу күтүлүүдө. Ошондой эле Кыргыз мамлекетинин башчысы Башкортостан жана Татарстанга барып, бул республикалардын башчылары менен жолугушмакчы.

Автор: Жылдыз Джускембаева