Түркмөн президенти абактагы миңден ашык адамга орозодогу кадыр түнгө карата мунапыс берди

Түркмөнстандын президенти Гурбангулы Бердымухаммедов орозо айындагы кадыр түн күнүнө карата миңден ашык абакта жаткандарга мунапыс ыйгарды.

Мындай маалымат Түркмөнстандын расмий маалымат булактарында жарыяланды.

Мамлекет башчы 16-июнда кол койгон жарлык менен бирге укук коргоо органдарынын жетекчилерине ырайым кылынган адамдарды тез арада үйлөрүнө жеткирүүнү тапшырды.

“Президент ошондой эле үйүнө кайткан адамдар ак эмгеги менен күнөөлөрүн жууп, өлкөнүн өнүгүшүнө активдүү катышуусу үчүн облус жана шаар башчыларына аларды жумушка орноштуруу боюнча тиешелүү чараларды көрүү тапшырмасын берди”, - деп айтылат расмий билдирүүдө.

Байкоочулардын айтымдарында, абактан чыккан адамдар жумушка орношууда чоң кыйынчылыктарга дуушар болушуп, полиция жана жергиликтүү бийлик тарабынан кысымдарга кабылышат.

“Prison policy initiative” уюмунун отчётуна ылайык, киши башына карата абактагылардын санынын көптүгү боюнча Түркмөнстан дүйнөнүн 170 өлкөсүнүн ичинен АКШдан кийинки экинчи орунда турат.

Автор: Илязбек Балташев
Фото: Интернеттен алынган