Чет өлкөлүктөр бейишке салыштырган Ысык-Көлдүн тескейи жана Барскоон (фоторепортаж)

Комплекстин курулушу

Ысык-Көлдүн тескейинин суусу тунук

Күндүн батышы

"Кумтөргө" кетчү жолго суу сээп турушат

"Кумтөрдөн" келе жаткан унаа

"Кумтөргө" кетчү жол

Барскоон капчыгайы

"Ысык-Көл" сөзүн угар замат көпчүлүк ызы-чуу болгон кум жээкти, экстремалдуу суу аттракциондорун, айрымдары катуу музыкасы менен түнкү клубдарды элестетишет. Көлдүн түндүк жагы дал ушундай баяндамага туура келсе, түштүк жээги, тескерисинче, эс алуучулары аз, тынч кум жээги менен айырмаланат. Бул тарап жаратылыш коюнунда эс алгысы келгендер үчүн эң ыңгайлуу. Эс алуучулардын катарын көбүнесе туристтер түзөт. Алардын айтымында, Ысык-Көлдүн тескейи кереметтүү жаратылышы, тунук суусу, таза абасы менен өзгөчөлөнүп турат. "Келген туристтер "жериңер бейиш экен" деп айтышат" дешет жергиликтүү тургундар. Чындыгында тескей тараптагы көлдүн суусу тунук экенине күбө болдук. Азырынча түндүк жактагыдай суу аттракциондор курула элек, жээгинин көпчүлүк жерлеринде кум аз. Мындан улам айылдардын коомдук уюмдары эс алуучулардын санын арттыруу максатында жээктерге кум төгүп жаңы пляждарды ачуу аракеттерин көрүшүүдө. Ошондой эле Тосор айылында августта ири масштабдуу той өтөрү пландалып, учурда ал үчүн комплекстин куруу иштери кызуу жүрүүдө. Уюштуруучулар иш-чара тескей жээкти чет элдиктерге таанытып, туристтерди кызыктыра турганын баса белгилешти.

Барскоон капчыгайы тууралуу көптөгөн сөздөр айтылып келет, "миң уккандан, бир көргөн артык" дегендей, ар бир кыргызга аталган капчыгайга барууну сунуштайбыз. Бийик карагайларга, мөңгү суусуна бай капчыгайда көз жоосун алган шаркыратмалар да бар. Мунун баары тоо туризмин өнүктүрүүгө шарт түзүүдө. Капчыгайды көргөн адам жаратылышына көзү тойбой кайтарына кепилдик беребиз. Кошумчалай кетсек, "Кумтөргө" кетчү жол дал ушул капчыгай аркылуу өткөндүктөн, оор жүк ташуучу унаалар кезеги менен өтүп турат.

Туристтер үчүн тейлөө кызматын көрсөтүп каражат тапкан тургундар Барскоонго келген туристтердин саны жылдан жылга көбөйүп жатканын баса белгилешет.

Автор: Үмүт Абдраимова
Фото: Үмүт Абдраимова