Microsoft корпорациясы Paint программасын Windows'тон алып салышы мүмкүн

Microsoft корпорациясы 1985-жылдан тарта Windows операциондук системинин түзүмүнө кирген Paint графикалык редакторунун үстүндө иштөөнү токтотту. Бул тууралуу чет элдик маалымат булактары жазып чыгышты.

Windows 10 Fall Creators Update операциондук системинин функциялары тууралуу баяндоодо Paint "активдүү иштетилбей калган, келечекте жаңы системдерден өчүрүлүшү мүмкүн" категориясындагы тизмеге кошулган. Ошондой эле жаңы версияда корпорация Outlook Express жана PDF менен TIFF документтерин окуй турган Reader тиркемесин өчүрөт. Reader функциясы Edge браузерине жайгаштырылат.

Microsoft Paint программасы сүрөттөр менен иштей турган жөнөкөй графикалык редактор. Ушул жылы жазында Windows 10до Paint 3D программасы иштелип чыккан, анда 3D-моделдер менен иштөө мүмкүн. Азырынча анын иштөөсүн токтотуу пландала элек.

Аталган Windows 10дун жаңылануусу ушул жылы күзүндө чыгары маалым болду.

Автор: Үмүт Абдраимова