Абдумалик Шерматов камкордугуна алган көзү азиз аялдын күйөөсү: "Шерматов аялымды акча табуу үчүн пайдаланып, мени үй-бүлөсүз калтырды"

15-августта алдамчылыкка шектелип Абдумалик Шерматов камакка алынгандан кийин ырчынын камкордугунда көзү азиз Айнагүл Абасова аттуу эки балалуу аял бар экени белгилүү болгон. Ал ырчы камалгандан кийин балдары менен үйүндө ачка отурганын айткан. Ал эми көзү азиз Айнагүлдүн Шамалды-Сай шаарчасындагы жолдошу, эки баласынын атасы Темиркул Асеков SUPER.KG`ге байланышып, буларды айтты:

“Абдумалик Шерматов аялым менен бирге иштешүүнү макулдашкандан кийин бизди алып кетти. 1 ай 15 күн мен алар менен чогуу жүрдүм. 2016-жылдын күз айлары болчу. Акыркы күндөрү ал мени сөгүп, басынтып, жаман мамиле жасай баштады. Мен ага чыдабай, эмне болсоңор ошол болгула, мени үйгө жеткирип койгула дедим. Ошондон кийин мен алардан бөлүнүп калдым.

Кайрымдуулукка деп мурда эле банктан эсеп ачкан болчубуз. Ал жерде элден чогулган үй алабыз деген 400 миң сом акчабыз бар эле. Кийин сураштырсам ал банктык эсепти да Бишкекке которуп кетишиптир. Мага кийин кайра келишти “алып кетели, биз менен чогуу жүр” деп. Бирок мен баргым келген жок. Азыр Айнагүл айтып жатат "мурда мени ичип келип урчу" деп. Мен анын чекесине чертчү эмесмин. Абдумалик менин көзү көрбөгөн аялымды акча табуу үчүн пайдаланып, мени үй-бүлөсүз калтырды”, - деди Темиркул Асеков.

Ал ырчы камалганын уккандан кийин Бишкекке келип, анын үстүнөн арыз жазганын да айтты.

Асековдун айтымында, 2016-жылдын башында оор шартта жашаган үй-бүлө Шамалды-Сай шаарчасындагы банктардын биринен эсеп ачып, кайрымдуу адамдар аларга жардам көрсөтө баштаган. Анткени үйү жок кичинекей үй-бүлө аймактагы кароосуз калган кампалардын биринде күн кечирчү. Ал эми анын жубайы көзү азиз Айнагүл Абасова чыгармачылык чөйрөгө, ырга жакын болгондуктан 2016-жылдын күзүндө ырчы Абдумалик Шерматов менен таанышып, бирге иштешүүнү чечет...

Ал эми Айнагүл Шерматов аркылуу чоң сахнага кадам таштап, жакшы турмуш кечирип жатканын айтып, ал аркылуу акча таап жүрөт деген кептерге ишенбей турганын айтты.

“Абдумалик жакшы адам. Ал мага көп нерселерди үйрөттү. Мени үйлүү болуп калсын деп Бишкекте кайрымдуулук концертин берди. Ал жерден 24 миң сом түштү. Мындан тышкары той-мааракелерге барып, ал жерден анча-мынча иштеп акча тапчубуз. Банктагы эсептерге түшкөн акчалар концерт уюштуруу, тамак-аштан ашкан жок. Москвага чейин алып барды. Азыр 800 миң сомго Кара-Балта шаарына жакын жерден үй алганбыз. Анын жарым акчасы төлөнө электигинен документтерин ала элекпиз. Ал мени алдап акча таап жүрөт деген сөздөр жалган, мен мындай кептерге ишенбейм”, - деди Айнагүл.

Эске сала кетсек, ырчы Абдумалик Шерматов алдамчылыкка шектелип, 15-августта убактылуу кармоочу жайга камалган. Учурда ырчынын үстүнөн жазылган арыздарды милиция иликтеп жатат.