Аида Чоткараева: "Аалам сулуусу-2017" сынагынын уюштуруучулары мендеги табигый сулуулуктун өзү жеңиш үчүн жетиштүү экенин айтышты"

"Аалам сулуусу-2017" сынагына Кыргыз өлкөсүнөн барып, "Сүрөткө мыкты түшкөн сулуу" наамына ээ болгон Аида Чоткараева SUPER.KG порталына сезимдери менен бөлүштү.

Ал өлкөнүн намысын жетиштүү деңгээлде, болгон аракетин жумшап коргогондугун, атаандаштарынын баары күчтүү экенин белгиледи.

"Мен абдан кубанып жатам, сынакка 85ке жакын катышуучу келген. Ошонун ичинен алдынкы 25 сулуунун катарына кирүү оңой болгон жок. Алдынкы 25 сулуунун ичине Казакстан, Орусия, Түндүк Америка же дагы башка өлкөлөр эмес Кыргыз өлкөсү кирди. Бул жакка дүйнөнүн булуң-бурчунан көптөгөн колдоочу, жардамчы, продюсер, стилисттери менен келген 60 өлкөнүн сулууларын артта калтырдым. Дүйнөлүк деңгээлдеги сынакта менин атымды жана менин өлкөмдүн атын айтканда абдан толкундандым. Сынакка даярданып жатканда мени колдогон адамдар болгон жок. Жумушум, жаш балам, үйдө аялдык милдеттерим бар экендигине карабай кызуу даярдык көрдүм. Ачыгын айтсам, Түштүк Африка Республикасы мени абдан колдоду, мындай колдоону күткөн эмесмин. Кыргыз өлкөсүнөн бул жакта эч ким жок болгону менен, алар мени кол чабуу менен жылуу тосуп алып жатты. Бул мага дем берди", - дейт модель.

Аида Чоткараеванын айтымында, буга чейин сынакка анын катышары тууралуу интернеттеги социалдык тармактарда талкуу болгон. Анда көпчүлүк интернет колдонуучулар ага ишеним артпай, жакшы натыйжа көрсөтө албайт деген пикирлерин калтырышкан.

"Мен бул ийгиликке жалгыз өзүм жетиштим, эч кимден эч нерсе сураган жокмун. Сынакка келип катышуу үчүн жумшалган каражатты өзүмдүн чөнтөгүмдөн короттум. Көйнөктөрдү эч ким Кыргыз мамлекетинин атынан бара жатасың деп акысыз берген жок, ижарага алдым. Башкасын айтпай эле коёюн, бизге жакынкы Казакстандан келген сулууну канча адам коштоп жүрөт, Казакстан ага жакшы колдоо көрсөтүп жатат. Ага дизайнерлер бүт кийимди тартуу кылышкан", - дейт Чоткараева.

Мындан тышкары Түштүк Африкага барган күнү моделдин саламаттыгында көйгөй жаралган. Мындай абалда өзүнүн күчүн, ажарын жетиштүү деңгээлде көрсөтө албай калам деп чочулап, сынактан баш тартууну туура көргөн.

"Уюштуруучулар менин мындай чечимимди четке кагышты. Алар "сенде табигый сулуулук бар экен. Жакшылап боёнуп, жасанууга ден соолугуң мүмкүнчүлүк бербей жатса чочулаба, сенин өзүңдүн сулуулугуң жетиштүү" дешти. Бул сөздөр өзүмө болгон ишенимди жогорулатты. Уюштуруучуларга жана "Аалам сулуусу-2017" сынагына катышууга мени сунуштаган Рыскүл Намазбековага ыраазычылык билдирем", - деп кошумчалады ал.

Айта кетсек, Түштүк Африканын Дурбан шаарында 28-августта башталган "Аалам сулуусу-2017" эл аралык сынагына 24 жаштан 50 жашка чейинки үй-бүлөлүү айымдар катышкан.

Аида Чоткараева учурда үй-бүлөлүү, 1 уулдун апасы. Ал "Сулуулар жана миллион", "Ашыктык асманы", "Браво" тасмаларында роль жараткан.