Сузакта 16 киши балмуздактан ууланды

Жалал-Абад облусунун Сузак районунда 16 киши балмуздактан ууланды. Бул тууралуу бүгүн, 4-сентябрда SUPER.KG порталына Саламаттыкты сактоо министрлигинин маалымат кызматынан билдиришти.

Маалыматка ылайык, ушул жылдын 1-сентябрь күнү Сузак районунун борбордук бөлүгүндөгү паркта эс алуучулар балмуздактан ууланып, райондун аймактык ооруканасына кайрылышкан.

"Дарыгерлер 3 кишини амбулатордук дарыланууга жөнөтүп, 13 адам ооруканага жаткырылган. Бирок кечкисин ууланган 13 адамдын абалы турукташып, үйлөрүнө чыгарылган", - дейт маалымат катчы.

Оорулардын алдын алуу жана мамлекеттик санитардык-эпидемиологиялык көзөмөл
департаменти бул боюнча кат бүгүн, 4-сентябрда келип түшкөнүн билдирди.

Департаменттин маалыматы боюнча, кабыл алынган каттын негизинде уулануунун келип чыгуу себептери текшериле баштайт.

Автор: Кызжибек Раимова
Фото: Интернеттен алынды