Бишкекте медициналык калдыктардын адамдарга жана жаратылышка тийгизген кесепетин жоюу боюнча семинар өтүүдө

Бүгүн, 17-октябрда Бишкекте медициналык калдыктардын адамдарга жана жаратылышка тийгизген кесепетин жоюу боюнча семинар өтүүдө. Ага Бишкектеги жана башка аймактардагы дарыгерлер, Саламаттыкты сактоо министрлигинин, Бириккен улуттар уюмунун өкүлдөрү катышып, медициналык калдыктардын табиятка, адамдарга тийгизген терс таасирин жоюунун жаңы технологиялык ыкмаларын талкуулашууда.

Саламаттыкты сактоо министринин орун басары Олег Горин: "Буга чейин медициналык калдыктарды башкаруу боюнча 2017-2020-жылдарга карата нормативдик-укуктук актыларды жана стратегияларды иштеп чыгуу үчүн мекемелер аралык жумушчу топтору түзүлгөн. Бул долбоор Бишкектеги жана Ысык-Көлдөгү 11 пилоттук дарылоочу-профилактикалык мекемелерде жакшы жыйынтыктарга жетти", - деп билдирди.

Бүткүл дүйнөлүк Саламаттыкты сактоо уюмунун маалыматына караганда, медициналык мекемелердин ишмердүүлүгүнүн натыйжасында пайда болгон калдыктардын 80 пайызы таштанды деп эсептелет. Калган 20 пайызы - инфекциялык, уулуу жана радиоактивдүү материалдар. Медициналык мекемелердин калдыктары ооруканаларда эмгектенгендерге жана бейтаптарга зыянын тийгизе турган коркунучтуу микроорганизмдерди камтыйт.

Автор: Саадат Токтоболот кызы
Фото: Саадат Токтоболот кызы