БШК шайлоого катышкан шайлоочулардын тизмесин жарыялады

Борбордук шайлоо комиссиясы президенттик шайлоого катышкан шайлоочулардын тизмесин биринчи ирет жарыялады. БШКнын маалымат кызматынан 23-октябрда кабарлашкандай, добуш берүүгө катышкандардын тизмеси аталган мекеменин расмий сайтынын "Шайлоо-2017" бөлүгүнө жайгаштырылып, ар бир аймак өз өзүнчө жазылган.

Мындай аракет Кыргыз Республикасынын президентин жана Жогорку Кеңештин депутаттарын шайлоо жөнүндө Конституциялык мыйзамдын 37-1-беренесинин 3-бөлүгүнө ылайык биринчи ирет жасалууда. Ошондой эле Конституциялык мыйзамдын 35-беренесиндеги 23-пунктуна ылайык, шайлоочулардын мөөр менен күбөлөндүргөн тизмеси (же анын көчүрмөсү) участкалык шайлоо комиссияларынын имаратынын кире беришиндеги такталарга илинди.

Эскерте кетсек, президенттик шайлоо 15-октябрда өтүп, алдын ала жыйынтык боюнча талапкерлердин арасынан Сооронбай Жээнбеков 54 пайыздан ашык көрсөткүч менен биринчи турда эле жеӊишке жетишкен. Добуш берүүчүлөрдүн жалпы саны 3 миллион 25 миң 770 болсо, анын 1 миллион 692 миң 423ү добуш берген.

Автор: Жамалидин Парманкулов