Бишкекте кызуу талкууга алынган арстандын баласына Акжолтой деген ысым берилди

Бир канча күндөн бери социалдык тармактарда кызуу талкууга алынган арстандын баласын багып жүргөн жаран аныкталып, жырткыч жаныбар "Бугу эне" коомдук фондуна өткөрүлүп берилди. Бул тууралуу бүгүн, 2-ноябрда Мамлекеттик экологиялык-техникалык инспекциясынан билдиришти.

"Арстандын баласы Мамэкотехинспекциянын инспекторлору жана укук коргоо органдары тарабынан издөөгө алынган. Натыйжада Кызыл китепке кирген жаныбардын баласын Ысык-Көл облусунун Д.А. аттуу жараны багып жүргөнү маалым болуп, жеринен протокол түзүлдү. Учурда инспекциянын экологдору Кызыл китепке кирген жаныбардын баласына Акжолтой деген ысымды ыйгарышып, "Бугу эне" коомдук фондуна өткөрүп беришти", - деп билдиришти аталган инспекциядан.

Эске сала кетсек, аталган жаныбар СИТЕСке кирген жапайы жаныбары болуп саналат. Мындай жырткыч жаныбар буга чейин Каракол шаарындагы жапайы жаныбарларды багуучу жайында багылып келген.

Адистердин айтымында, бул жырткыч жаныбар улам чоңойгон сайын кооптуу болуп, адам өмүрүнө кол салып дагы жибериши толук мүмкүн. Андыктан бул жаныбарды өткөрүп алган тарап дыкаттык менен көзөмөлдөп турушарын баса белгилешти. Ал эми жаныбарды мыйзамсыз багып жүргөн жаранга карата учурда иликтөө иштери жүргүзүлүп баштады.

Автор: Бекжан Рыскулов