"Кылым шамы" борбору Чубак Жалиловдун экинчи аял алганы боюнча айткан сөздөрүн текшерип, укуктук баа берүү үчүн прокуратурага кайрылат. Бул тууралуу SUPER.KG порталына аталган адам укугун коргоо борборунун директору Азиза Абдирасулова билдирди.
Анын айтымында, диний ишмер өзү кылмыш кылганын моюнуна алып, мыйзамды бузуп жатат.
"Өлкөдө көп аял алганга тыюу салган мыйзам бар. Аны сыйлап аткарыш керек. Чубак Жалилов өз сөзүндө кылмыш кылганын моюндап, мыйзамды бузуп жатат. Экинчиден, ал көп аял алганга мүмкүнчүлүгү барларды үйлөнгүлө деп үгүттөп жатат. Анын айынан көптөгөн үй-бүлөлөр ажырашып, канча деген балдар атасыз калышы мүмкүн. Жалилов жөн адам эмес да, ал аалым киши. Өлкөдө анын айткандарын угуп, ага окшошууга аракет кылгандар көп. Анын коом алдында ачык чакырык жасап жатканы өтө коркунучтуу нерсе", - деди Абдирасулова.
Айта кетсек, буга чейин диний ишмер Чубак Жалилов элден келген суроолорго жооп берип жатып, экинчи аял алганын айткан. Бул маалыматты ал SUPER.KG порталына да тастыктаган болчу.
Кыргыз Республикасынын Кылмыш-жаза кодексинин 153-беренесинде "Эки же андан көп аял алганда, башкача айтканда, жалпы чарба жүргүзүп, эки же андан көп аялдар менен чогуу жашаганда, эки жылга чейинки мөөнөткө эркиндигинен ажыратууга жазаланат" деп жазылган.