ЖЫЛНААМА, 16-ЯНВАРЬ: Атактуулугу артып турган учурда күнүнө 10 миң долларга чейин каражат тапкан британиялык модель Кейт Мосс 44 жашка толду

Британиялык белгилүү модель жана актриса Кейт Мосс карьерасын 14 жашында баштап, ошондон тарта атактуулугун жоготпой келет. Ал 1974-жылы 16-январда Англияда туулган. 1990-2000-жылдардагы эң көп киреше тапкан моделдердин сап башында турат.

14 жашында аэропортто турган учурунда Лондондогу белгилүү моделдик агенттиктердин биринин директору Моссту байкап, аны кастингге катышууга чакырат. Анын сунушун кабыл алган Кейт модель катары өзүн сынап, 2 жыл ичинде аты калың элге таанылат.

Ошентип 20 жашында алгачкы миллион долларын табат. 1990-2000-жылдар аралыгында ал кездеги күчтүү моделдерди артка таштап, эң көп киреше тапкан сулууга айланат. Тактап айтканда, бир канча атактуу бренддердин жарнамаларына тартылып, күнүнө 10 миң долларга чейин каражат таба баштаган. Ал учурда моданын жылдызына айланган Мосско киного тартылуу сунуштары түшө баштаган.

Кызы менен

Карьерасында ийгиликтер коштолгону менен, жеке жашоосунда андай болгон эмес. Тактап айтканда, модель жашоосунда бир нече эркектер менен мамиле түзүп көргөн. Бирок узакка созулган эмес. Кийинчерээк Жефферсон Хэк аттуу мырза менен олуттуу мамиле куруп, 2002-жылы кыздуу болгон. Түгөйлөр 2005-жылы эки башка жолду тандап, 2011-жылы Жейми Хинс аттуу музыкантка турмушка чыккан. Аны менен 2016-жылы ажырашып кеткен.

Модель тууралуу кызыктуу фактылар:

Calvin Klein брендинин жарнамасына тартылган соң атактуулугу арткан;
Дизайнер катары өзүн сынап көргөн. Тагыраагы Topshop бренди менен келишим түзүп, биргеликте 14 кийимдер топтомун тартуулаган;
Жалпысынан белгилүү журналдардын башкы бетине 300дөн ашуун сүрөтү жарыяланган;
2011-жылы музыкант Жейми Хинсге турмушка чыкканда, 16 кыз колуктунун курбусунун ролун аткарышкан;
Баңгизатынан көз каранды болуп калгандыктан, 2005-жылы АКШдагы клиникалардын биринен дарыланып чыккан. Ага карабастан азыркы кезге чейин тамеки чегип, ичимдик ичет;

16-январдын жылнаамасы.

Автор: Наргиза Талантбекова