ЖЫЛНААМА, 20-ЯНВАРЬ: Гүлнур Асанова: "Кичинекей жээнимдин куттуктоосу жүрөгүмдү элжиретти"

"Супер-Инфонун" тандоосу боюнча "2011-жылдын супер дебюту" наамынын ээси, кыргыздын салттуу музыкасын тандап, калкка талантын тартуулап келе жаткан ырчы, актриса Гүлнур Асанова бүгүн, 20-январда 30 жашка чыкты.

Ырчы менен байланышып туулган күнү менен куттуктаганыбызда, ал ыраазычылыгын айтып төмөнкүлөрдү билдирди.

"Эмнегедир 30 жаш башкача угулат экен. Жарык дүйнөгө келген күнүм менен бүгүн таң эрте биринчилерден болуп Умар аттуу кичинекей жээним куттуктады. Жаңы чыгып келе жаткан бал тили жүрөгүмдү элжиретип жиберди. Бул кичинекей мааракемди жакын адамдарым менен белгилейин деп жатам", - дейт ал.

Ошондой эле ырчы жыл сайын туулган күнүнө түрдүү белектерди аларын, ал үчүн эң оригиналдуу жана эстен кеткис белек болуп апасынын 29 жашына арнап чыгарган 10 куплет ыры экенин кошумчалады.

Гүлнур Асанова Аксы районунун Кербен шаарында 1988-жылы жарык дүйнөгө келген. Ал ырдап, дастан айтуудан сырткары “Туңгуюк”, “Ак кеме”, “Уркуя”, "Эгиздер тагдыры", "Кылмыш" тасмаларында роль жараткан.

Ошондой эле "Улуу Жибек Жолу", "Нооруз-2010", "Нооруз-2011" эл аралык фестивалдарынын лауреаты, "Маданияттын мыкты кызматкери" төш белгисинин ээси жана башка сыйлыктар менен сыйланган.

Автор: Айзада Тураркулова