ЖЫЛНААМА, 2-ФЕВРАЛЬ: Колумбиялык бийчи жана өзгөчө үндүү ырчы Шакира 41 жашка толду

Атактуу ырчы, бийчи жана модель Шакира 1977-жылы 2-февралда Колумбиянын Барранкилья шаарында жарык дүйнөгө келген. Анын таланты бала кезинен эле байкалган. Алгач башкалардан дилгирлиги, баарын өздөштүрүп кетүүсү менен айырмаланып турган. Мектепте окуп жүргөндө ар кандай иш-чараларда чыгыш бийин тажрыйбалуу деңгээлде бийлеп, элди таң калтыра баштаса, 8 жашынан тарта ырдап баштаган.

Шакира таланты гана эмес, сулуулугу менен да башкалардан айырмаланып турган. 13 жашында "Sony Music" компаниясы менен өзүнүн альбомун чыгаруу жөнүндө келишим түзөт. Альбом ийгиликтүү болуп жаш кызды бүткүл Колумбияга таанытат. Ошентип 14 жашында өлкөсүндөгү өзгөчө үндүү атактуу ырчыга айланат.

Ал эми ырчынын экинчи чыккан “Коркунуч” аталышындагы альбому тескерисинче ийгиликсиз болуп калат. Мындан улам ал өз каалоосу менен бул альбомун жарнамалоону токтотот. Бул анын маанайына терс таасир тийгизип, туулган жерин, досторун таштап, апасы менен чогуу Колумбиянын борбору Богота шаарына жол тартат.

Борборго келгенден кийин эң биринчи "Sony Music" офисине жана "TV GUIA" журналына барып, интервью берет. Ал маектен кийин Шакирага "CENPRO" каналынан “Оазис” деген телесериалда башкы ролду ойноого сунуш түшүп, тартылып калат.

Учурда ал "Барселона" футболдук клубунун коргоочусу Жерар Пике менен жарандык никеде жашайт, ал эми экөөнүн ортосунда Милан жана Саша аттуу балдары бар. Түгөйлөр 2010-жылдын күз айларынан бери мамиле куруп келишкенин 2011-жылдын март айында гана ачыкташкан. Кызыгы Шакира сүйүктүүсүнөн толук 10 жашка улуу. Тактап айтканда, бүгүн Пикенин да туулган күнү, ал 31 жашка толду.