Бишкекте кумар оюндарын ойногон жашыруун жай табылды

Экономикалык кылмыштуулукка каршы күрөшүү боюнча мамлекеттик кызматы тарабынан кумар оюндарын ойногон жашыруун жай табылды. Бул тууралуу аталган мекеменин басма сөз кызматынан билдиришти.

"Буга чейин Бишкек шаарынын Медеров көчөсүндөгү №46-үйдүн жер төлөсүндө жашыруун түрдө кумар оюндары ойнотулуп жатканы тууралуу маалымат түшкөн. Кечээ, 7-февралда күндүз бул факты боюнча кылмыш иши козголгон. Аталган жайга Экономикалык кылмыштуулукка каршы күрөшүү боюнча мамлекеттик кызматынын кызматкерлери түндө саат 22:00дөр чамасында барышып тинтүү иштерин жүргүзүшкөн. Натыйжада ал жерде чындап эле жашыруун түрдө кумар оюндары ойнолгон жай бар экени аныкталган. Учурда иликтөө иштери жүрүп, уюштуруучуларын аныктоо аракеттери көрүлүүдө", - деп билдиришти басма сөз кызматынан.

Айта кетсек, бүгүн, 8-февралда президент Сооронбай Жээнбеков Коопсуздук кеңешинин жыйынында Бишкек жана Ош шаарларында казино, кумарканалар учурда да иштеп жатканын, укук коргоо органдары аларга чараларды көрбөй жатышканын айткан.