Олимпиада оюндарына 8-жолу катары менен катышып жаткан алгачкы спортчу аталды

Олимпиада оюндарына 8-жолу катары менен катышып жаткан алгачкы спортчу аталды. Бул тууралуу чет элдик маалымат каражаттары жазып чыгышты.

Маалым болгондой, япониялык спортчу Нориаки Касай Олимпиада оюндарына 8-жолу катышып жаткан алгачкы спортчу. Ал лыжа менен трамплинден секирүү боюнча турнирдин квалификациясынан 20-көрсөткүчтү көрсөтүп, XXIII Кышкы Олимпиада оюндарынын финалына жолдомо алган.

Касай алгач 1992-жылы Альбервилде өткөн кышкы Олимпиада оюндарына катышкан. Ошондон тарта ушул күнгө чейин Олимпиада оюндарын калтырган эмес. Бул убакыт аралыгында 3 жолу Олимпиада медалдарына ээ болгон. 1994-жылы өткөн оюндарда күмүш медалга ээ болсо, 2014-жылы Сочиде өткөн Олимпиадада күмүш жана коло медаль жеңип алган.

Ошондой эле 45 жаштагы спортчу 13 дүйнөлүк чемпиондукка катышып, 2 күмүш, 5 коло медалга татыган.

Автор: Айзада Тураркулова