Кытайда лифт менен жүргөндөрдөн акы алына баштады

Кытайдын борбору Пекиндин айрым көп кабаттуу турак үйлөрүнө коюлган лифтке акча төлөп түшүү талап кылынды. Бул жөнүндө чет элдик маалымат каражаттары жазып чыгышты.

Маалыматка караганда, алгач акы төлөнүүчү лифттер шаардын түштүгүндөгү лифт жок үйлөргө коюлган. Акы төлөө жолдору коомдук транспортко акы төлөгөн системдик тартипте ишке ашат. Ар бир лифтке түшкөн учурда электрондук билеттен 0,2 юань (0,03 доллар) өлчөмүндөгү каражат алынары белгилүү болду.

Мындай шартка тургундардын ичинде макул болгону да, болбогондору да бар. 60 жаштагы пенсионер Ян Гуйсян: "Жөө көтөрүлгөнгө караганда бир топ ыңгайлуу болуп калды, мурда жүк менен жогору чыгуу татаал болчу", - деп билдирсе, социалдык тармактын колонуучуларынын бири "0,2 юань чоң акча эмес болгону менен, айдын аягында жөө эле чыгууну каалап калбасак болду", - деп билдирүү калтырган.

Акылуу лифттерге ар бир жаран орто эсеп менен айына 100 юань каражат коротушу мүмкүн экендиги аныкталган.

Автор: Бекболсун Молдояр уулу