Кышкы Олимпиада оюндары: Жаңыланган рекорд жана Түштүк Кореянын 4-алтын медалы. Мелдештин 11-күнүнүн жыйынтыгы

Кечээ, 20-февралда Түштүк Кореянын Пйоңчаң шаарында өтүп жаткан Кышкы Олимпиада оюндарынын он биринчи мелдеш күнү жыйынтыкталды.

Анда кышкы спорттун 10 түрүнөн мелдештер өтүп, 5 түрү боюнча медалдар ойнотулду.

• Биатлон;
• Муз үстүндө бийлөө;
• Фристайл;
• Лыжа менен жарышуу;
• Шорт-трек;

Биатлон

Биатлон боюнча мелдеш 20 команда арасында өттү. Ар бир команда 2 эркектен жана 2 кыз-келинден турду, анда эркектер 7 чакырым аралыкты ашып өтсө, кыз-келиндер 5 чакырым 600 метр аралыкты өтүштү. Мелдештин жыйынтыгында 1 саат 8 мүнөт 34.3 секунд жыйынтыгын көрсөткөн франциялык Мари Дорен-Абер, Анаис Бескон, Симон Детьё жана Мартен Фуркад алтын медалдардын ээси болушту. 1 саат 8 мүнөт 55.2 секунд жыйынтыгын көрсөткөн норвегиялык Марте Олсбю, Тириль Экхофф, Йоханнес Тиннес Бё жана Эмиль Свеннсен күмүш медалдарды багындырса, италиялык Лиза Виттоцци, Доротея Вирер, Лукас Хофер жана Доминик Виндиш марага 1 саат 9 мүнөт 1.2 секундда жетип, коло медалдардын ээси болушту.

Муз үстүндө бийлөө

Муз үстүндө бийлөө боюнча мелдеште 20 команда катышты. Канадалык Тесса Вертью жана Скотт Моир 206.07 упай топтоп алтын медалдарды тагынгандан тышкары, Дүйнөлүк рекордду жаңылады. Күмүш медалдын ээлери франциялык Гийом Сизерон менен Габриэла Пападакис болду, алар 205.28 упайга ээ болушту. Коло медалды 192.59 упай топтоп АКШлык Алекс Шибутани жана Майя Шибутани тагынышты.

Фристайл

Кыз-келиндер арасында өткөн фристайл боюнча мелдеште жалпы 24 спортчу катышты. Мелдештин жыйынтыгында канадалык Кэсси Шарп 95.80 мыкты көрсөткүчү менен 1-орунду ээледи, франциялык Мари Мартино 92.60 жыйынтыгы менен 2-орунда жайгашса, 3-орунду АКШлык Брита Сигурни жеңип алды.

Лыжа менен жарышуу

Эркектер арасында өткөн лыжа менен жарышуу боюнча мелдеште жалпы 47 спортчу катышты. Мелдештин жыйынтыгында алдыңкы 3 орунду германиялык спортчулар багындырды. Анда 1-орунду 23 мүнөт 52.5 секунд жыйынтыгы менен Йоханнес Ридзек ээлеп, алтын медалды тагынды. 23 мүнөт 52.9 секунд жыйынтыгын көрсөткөн Фабиан Риссле 2-орунду ээлесе, 3-орунду 23 мүнөт 53.3 секунд жыйынтыгы менен Эрик Френцель жеңип алды.

Шорт-трек

Шорт-трек боюнча мелдеште 8 кыз-келиндер командасы эстафета түрүндө 3 чакырым аралыкка жарышты. Мелдештин жыйынтыгында Түштүк Корея курама командасы алтын медалдарга ээ болду. Италия курама командасы 2-орунду ээлеп, Голландия курамасы 3-орунду ээледи.

Медалдык жарыш

Медалдык жарышта азыркы тапта лидерликти Норвегия, Германия жана Канада курама командалары сактап келе жатышат. Норвегия 11 алтын, 10 күмүш жана 8 коло медаль менен 1-орунда, Германия курамасы алтын медалдар боюнча Норвегияга жетип, бирок күмүш жана коло медалдар боюнча артта калууда (11 алтын, 7 күмүш жана 5 коло). Канада курама командасы 3-орунда жайгашты, анын капчыгында 8 алтын, 5 күмүш жана 5 коло медаль бар.