Америкалык ди-джей түз эфир учурунда көз жарды

Америкалык радио алып баруучу Кэссиди Проктор таңкы "Spencer's Neighborhood" түз эфирин алып барып жаткан маалында көз жарды. Бул тууралуу чет элдик маалымат каражаттары жазып чыгышты.

Маалым болгондой, ди-джейдин толгоосу мөөнөтүнөн 2 жума мурун башталган. Кокустан башталган толгоодон улам радио жетекчилиги анын төрөгөнүн түз эфирден берүүнү сунуштаган. Алып баруучу дароо макул болгон.

"Адам жашоосундагы эң бактылуу мүнөттөрүн өзүнүн сүйүктүү угармандары менен бөлүшө алгандыгы кандай керемет. Мен дайыма угармандарым менен түз эфирден сырдашып, алар менен бардык жаңылыктарды бөлүшүп турам. Бул жолу да алар менин жашоомдогу эң маанилүү көз ирмемдерде мени менен чогуу болуусун кааладым", - деген Кэссиди Проктор.

Белгилей кетсек, жарык дүйнөгө келген ымыркайга Жеймсон деген ысым ыйгарылган. Бул ысымды алып баруучуга угармандары сунуш кылышкан.