Чычканда 2-жолу түшкөн кар көчкү толук тазаланып бүттү

Чычкан капчыгайы аркылуу өткөн Бишкек-Ош унаа жолуна 2-жолу түшкөн кар көчкү толук тазаланып бүттү. Бул тууралуу бүгүн, 15-мартта Өзгөчө кырдаалдар министрлигинин басма сөз кызматынан билдиришти.

Маалыматка ылайык, Бишкек-Ош унаа жолунун 249-чакырымына 2 миң 880 метр куб көлөмүндөгү кар көчкү түшкөн. Аны тазалоого 3 техника тартылып, саат 19:00дөр чамасында толук тазаланып бүткөн.

Андан сырткары Чычкан капчыгайындагы Бишкек-Ош унаа жолунун 223-чакырымында да 7 миң 500 метр куб кар көчкү түшүп, учурда тазалоо иштери жүрүп жатканын кабарлашты.

Басма сөз кызматынын маалыматына ылайык, кар көчкүдөн эч ким жабыркаган эмес.

Автор: Кенжебай Сатканалиев