Мексикада ымыркай сиам эгиздери ийгиликтүү ажыратылды

Мексикада сиам эгиздерин ажыратуу үчүн жүргүзүлгөн операция ийгиликтүү өттү. Чет элдик басылмалар жазгандай, ымыркайларга төрөлгөндөн 41 күндөн кийин операция жасалган.

"32 жаштагы эне кош бойлуулуктун 26-аптасында гана эгиздер бири-бирине жабышып өсүп жатканын УЗИ аркылуу билген. Балдардын көкүрөктөрү жана курсактары жабышып калган", - деп жазылат маалыматта.

Эне өткөн жылдын 15-декабрында кесарево жолу менен көз жарган. Сиам эгиздеринин салмагы 5 килограммдан жогору болгон. Аларды ажыратуу үчүн 2 сааттай операция жасалган. Дарыгерлер балдарды тынымсыз карап, алардын органдарынын баары тийиштүү деңгээлде иштеп жаткандыгына көзөмөл кылууда.

Автор: Кызжибек Раимова