Сеулда мэриянын кызматкерлери жумуштан өз убагында кетиши үчүн жума күндөрү компьютерлери автоматтык түрдө өчүрүлөт

Сеулдун мэриясы өз кызматкерлерин жума күнү жумуш убактысы бүткөн соң кармалбастан өз убагында үйлөрүнө кетүүгө мажбурлайт. Бул үчүн кызматкерлердин компьютерлерин атайылап өчүрүп коюшат. Бул тууралуу аталган шаардын администрациясына таянып, жергиликтүү басылмалар жазып чыгышкан.

Маалым болгондой, мындай демилге ушул жылдын 30-мартынан тартып башталат жана 3 айга созулуп, 3 бөлүккө бөлүнөт. Биринчи бөлүктө компьютерлер саат 20:00дө өчүрүлөт. Экинчи бөлүк апрелде башталып, анда компьютерлер 30 мүнөткө эрте, тактап айтканда, 19:30да өчүрүлөт. Ал эми үчүнчүдө ар жума күнү саат 19:00дөн тартып компьютерлер өз ишин токтотот. Мэриянын маалыматында, кызматкерлердин 67 пайызы компьютерлерин автоматтык түрдө өчүрүүгө каршылыктарын билдиришкен. Бирок бул демилге бардык кызматкерлерге тийиштүү.

Белгилей кетсек, Түштүк Корея - дүйнөдөгү иш убактысы узакка созулган мамлекеттердин катарында. 2016-жылдагы изилдөөдө аталган өлкөнүн кызматкерлери европалык жумушчулардан орто эсеп менен 500 саатка көбүрөөк иштей турганы аныкталган. Ал эми март айынын башында Түштүк Кореянын парламенти иш жумасын 68 сааттан 52 саатка чейин кыскартууну колдогон. Бул мыйзам июль айынан тарта күчүнө кирет.

Автор: Наргиза Талантбекова