Депутат Орозова: "Өкмөт сунуштап жаткан жөлөк пул жөнүндө мыйзам кабыл алынса нааразычылыктар көп болот"

"Өкмөт сунуштап жаткан жөлөк пул жөнүндө мыйзам долбоору өтсө, нааразычылыктар көп болот", - деп бүгүн 25-мартта Жогорку Кеңештин тийиштүү комитетинин жыйынында КСДП фракциясынан депутат Карамат Орозова билдирди.

Депутат балдардан акча аябаш керек деген пикирин айтты. "Жакыр үй-бүлөлөр жөлөк пул алуу үчүн маалымат кат чогултканга алыскы айылда жашагандар районго келиши керек болот. Акча талап кылынат. Бул мыйзам кабыл алынса, элдин нааразычылыктары көбөйөт. Башка нерселерге акчаны аябайбыз, балдарга келгенде аяп калабыз. 1 жарым жашка чейин бардык балдарга жөлөк пул берилиши зарыл", - дейт депутат.

Айта кетсек, Жогорку Кеңеш 2017-жылдын 21-июнунда “Мамлекеттик жөлөк пулдар жөнүндө” мыйзамына өзгөртүү киргизүү тууралуу” мыйзамын кабыл алган. 1-августта ага ошол кездеги президент Алмазбек Атамбаев кол койгон. Мыйзамдагы негизги өзгөртүү - бул "Аз камсыздалган үй-бүлө" деген норма жоюлуп, "Балага сүйүнчү", "Балага жөлөк" жана "Үй-бүлөгө көмөк" деген жаӊы түшүнүктөр киргизилгенинде болгон. Мыйзам 2018-жылдын 1-январынан тарта күчүнө кирмек. Анда жөлөк пулдун 3 түрү каралган эле. Ал өзгөртүүлөргө ылайык, жаңы төрөлгөн балага бир жолу 4 миң сом "сүйүнчү пул", 3 жашка чейинки бардык балдарга ай сайын 700 сомдон "жөлөк пул", 3 жаштан 16 жашка чейинки балдарга айына 500 сом "үй-бүлөгө көмөк" акча берилмек. Бирок бул көмөк акча бардыгына эле берилбей тургандыгы айтылган. Үй-бүлөнүн 3 жаштан 16 жашка чейин үчтөн ашык баласы болсо, жөлөк пул үчүнчү баладан баштап андан кийинкилерге гана берилмей болгон. Мисалы, 5 баласы барлар 1-2-баласына жөлөк пул ала алышпайт деп түшүндүрүлгөн. Талаш-тартыш дал ушул жерден башталган.

2017-жылдын декабрь айында бул мыйзамга Нарын облусунун тургундары каршы митингге чыгышкан. Алар 3 жана андан көп баласы бар үй-бүлөлөргө төлөнүүчү жөлөк пулда каралган чектөөлөргө каршы экенин билдиришкен. Мындан улам өкмөт 2018-жылдын 1-январында күчүнө кире турган аталган мыйзамдын "балага сүйүнчү" төлөөгө тийиштүү жобосун кошпогондо, ишке кирүү мөөнөтүн 3 айга артка жылдырууну сунуштаган. Ошондой эле өкмөт бул мыйзам күчүнө кирсе 30 миңдей бала жөлөк пул албай кала турганын айтышкан.

Жаңы иштелип чыккан мыйзам долбоору боюнча, 3 жашка чыкканга чейин берилүүчү жөлөк пулдун жана 3 жаштан 16 жашка чейинки курактагы үч жана андан ашык балдары бар жарандарга ай сайын берилген жөлөк пулдун ордуна муктаж үй-бүлөлөргө берүүнү сунуштаган. Ошондой эле ден соолугунун мүмкүнчүлүгү чектелген балдарга жана бала кезинен ден соолугунун мүмкүнчүлүгү чектелген жарандарга ай сайын социалдык жөлөк пулдун өлчөмүн жогорулатуу сунушталууда.

Автор: Жылдыз Джускембаева