Акыйкатчы: "Мектеп-интернатындагы балдардын 5 пайызы гана томолой жетим болсо, калганынын ата-энелери бар"

Бүгүнкү күндө 11 миң 400дөй бала мектеп-интернатында тарбияланып жатат. Бул тууралуу акыйкатчы Кубат Оторбаевдин бүгүн, 29-мартта ата-энесинин кароосу жок калган балдардын жана мыйзамды сактабаган балдардын укуктарынын сакталышына арналган докладында айтылды. Анын билдиришинче, алардын ичинен 5 пайызы гана томолой жетим болсо, калган балдардын ата-энелери бар. Ошол эле учурда көпчүлүгү мигранттардын балдары экенин кошумчалады.

"Миграциялык агымдын күчөгөнүнөн улам балдарын мектеп интернаттарына таштап койгондор көп болуп жатат. Баланы мектеп-интернаттарына айла кеткен учурда гана берүү керек. Ошондой болгон күндө да бала 6 айга гана калтырылат. 6 айдан кийин баланы чыгарып кетиши шарт. Тилекке каршы, бизде мындай болбой жатат. Ал жерде шарттар оор. Бала кордук көрөт, ур-токмокко кабылып, ысык-суукта калышы мүмкүн", - деди Оторбаев.

Ошондой эле акыйкатчы мыйзамды бузган балдардын укуктарын сактоо маселесине токтолду. Анын айтымында, бала кокустуктан мыйзамга каршы иш жасаса, аны жазалоонун ордуна тарбияга чакырган аракеттерди көрүү керек.

Автор: Жамалидин Парманкулов