Жөлөк пул алгандардын саны эмне үчүн эки эсеге өсө тургандыгынын себеби айтылды

Үй-бүлөлүк кирешеден пенсияны алып салуудан жөлөк пул алган балдардын саны 2 эсеге өсөт. Бул тууралуу SUPER.KG порталына Эмгек жана социалдык өнүгүү министрлигинин басма сөз кызматынан түшүндүрүштү.

Маалыматка караганда, мыйзамга ылайык үй-бүлөнүн кирешеси ар бир жанга эсептегенде 900 сомдон ашпаса, жөлөк пул берилет. Жаңы кабыл алынган жөлөк пул жөнүндө мыйзамда үй-бүлөнүн кирешеси боюнча өзгөртүүлөр киргизилди. Мурдагы мыйзам боюнча үй-бүлө кирешесине ошол үйдөгү пенсия алган адамдын каражаты да киреше катары эсептелсе, жаңы кабыл алынган мыйзамда пенсия үй-бүлө кирешесинен алынып салынды. Ошол себептен жөлөк пул алып келген балдардын саны жаңы мыйзам күчүнө киргенден кийин эки эсеге өсөт.

Ушул тапта өлкө аймагы боюнча 298 миӊ бала жөлөк пул алат.

Эске салсак, кечээ, 29-мартта Жогорку Кеңештин жыйынында эмгек жана социалдык өнүгүү министри Таалайгүл Исакунова "Сунушталган жаңы мыйзам кабыл алынса, жөлөк пул алган балдардын саны эки эсеге өсөт", - деп билдирген. Ошол эле күнү Жогорку Кеңеш балдарга жөлөк пул боюнча мыйзамды кабыл алган.

Мыйзамга өлкө башчысы Сооронбай Жээнбеков кол койсо, мыйзам 1-апрелден тартып ишке кирмекчи.

Жогорку Кеңеш 2017-жылдын 21-июнунда “Мамлекеттик жөлөк пулдар жөнүндө” мыйзамына өзгөртүү киргизүү тууралуу” мыйзам кабыл алган. 1-августта ага ошол кездеги президент Алмазбек Атамбаев кол койгон. Мыйзамдагы негизги өзгөртүү - бул "Аз камсыздалган үй-бүлө" деген норма жоюлуп, "Балага сүйүнчү", "Балага жөлөк" жана "үй-бүлөгө көмөк" деген жаӊы түшүнүктөр киргизилгенинде болгон. Мыйзам 2018-жылдын 1-январынан тарта күчүнө кирмек. Анда жөлөк пулдун 3 түрү каралган эле. Ал өзгөртүүлөргө ылайык, жаңы төрөлгөн балага бир жолу 4 миң сом сүйүнчү пул, 3 жашка чейинки бардык балдарга ай сайын 700 сомдон жөлөк пул, 3 жаштан 16 жашка чейинки балдарга айына 500 сом үй-бүлөгө көмөк акча берилмек.

Бирок бул көмөк акча бардыгына эле берилбей тургандыгы айтылган. Үй-бүлөнүн 3 жаштан 16 жашка чейин үчтөн ашык баласы болсо, жөлөк пул үчүнчү баладан баштап андан кийинкилерге гана берилмей болгон. Мисалы, 5 баласы барлар 1-2-баласына жөлөк пул ала алышпайт деп түшүндүрүлгөн. Талаш-тартыш дал ушул жерден башталган. 2017-жылдын декабрь айында бул мыйзамга Нарын облусунун тургундары каршы митингге чыгышкан. Алар 3 жана андан көп баласы бар үй-бүлөлөргө төлөнүүчү жөлөк пулда каралган чектөөлөргө каршы экенин билдиришкен. Мындан улам өкмөт 2018-жылдын 1-январында күчүнө кире турган аталган мыйзамдын "балага сүйүнчү" төлөөгө тийиштүү жобосун кошпогондо, ишке кирүү мөөнөтүн 3 айга артка жылдырууну сунуштаган. Ошондой эле өкмөт бул мыйзам күчүнө кирсе 30 миңдей бала жөлөк пул албай кала турганын айтышкан.