Бүгүн Бишкектин бир нече мектептеринде окуу болгон жок

Бүгүн Бишкектин бир нече мектептеринде окуу болгон жок. Бул тууралуу Билим берүү жана илим министрлигинин басма сөз кызматы билдирди.

"Бүгүн Бишкек шаарындагы №6, 70, 28, 4, 11, 12, 65, 67- орто мектептеринде окуу болгон жок. Окуу процессинин токтошу мектептер жайгашкан райондордо суунун убактылуу өчүрүлүшү менен байланыштуу. Эртең мектептер кайрадан иштей башташат", - дейт басма сөз кызматы.

Бүгүн, 3-апрелде социалдык тармактарда Бишкек шаарындагы маршруттук таксилердин каттамдары жүрбөгөндүгүнөн улам бир нече мектептин окуучулары сабакка барбагандыгы тууралуу маалымат тараган.

Белгилей кетсек бүгүн, 3-апрелде "Көк-Жар" суу тосмосунда оңдоо иштери жүрүп жаткандыгына байланыштуу саат 9:00дөн баштап саат 21:00гө чейин Панфилов көчөсүнөн Аламүдүн суусуна чейинки жана темир жолдон Фрунзе көчөсүнө чейинки аймакта таза суу берүү токтотулду.

Автор: Айзада Тураркулова