Волейбол боюнча Азия чемпиондугу: Кыргыз курама командасы Түркмөнстанга жеңилип калды

Волейбол боюнча Кыргыз курама командасы Азия чемпиондугунун алкагындагы алгачкы беттешинде жеңилүү ызасын тартты. Бул тууралуу SUPER.KG порталына Кыргыз Республикасынын волейбол федерациясынан билдирди.

Бангладештин Дакка шаарында 21-27-апрель аралыгында өтүүдө. Анда Азиянын "Борбордук зона" чөлкөмүнө кирген 6 өлкө катышууда. Алар 2 тайпага бөлүнүп өз ара беттешет. Кыргыз курамасы "В" тайпасына кирип Түркмөнстан жана Өзбекстан курамалары менен беттешмекчи. Ал эми "А" тайпасында Бангладеш, Мальдив аралдары жана Непал курама командалары кездешет.

Тайпалык баскычтын жыйынтыгында 1-2-орунду ээлеген командалар жарым финалга өтүшөт.

Кыргыз курама командасы алгачкы беттешинде Түркмөнстан курамасы менен беттешип, тилекке каршы, 3:0 эсеби менен жеңилип калды. Түркмөн волейболчулары беттештин жүрүшүндө партиялар боюнча 25:23, 35:33 жана 28:26 эсеби менен жеңишти илип кетти.

Кыргыз волейболчулар эртең, 24-апрелде Өзбекстан курамасы менен беттешет.

Автор: Нурсултан Нурболот уулу