Малайзиянын 60 жылдык тарыхында оппозиция 1-жолу жеңишке жетишти

Оппозиция лидери Махатхир Мохамад

Бүгүн, 9-майда Малайзияда парламенттик шайлоо өтүп, өлкөнүн 60 жылдык эгемендик тарыхында биринчи жолу оппозиция жеңишке жетти. Бул тууралуу оппозиция лидери Махатхир Мохамад жарыялады, бирок расмий бийлик жыйынтык чыгарууну кечеңдетип, көчөгө чогулган элди кыжырлантууда.

Шайлоонун алдын ала жыйынтыгы боюнча, "Пакатан Харапан" оппозициялык блок "Барисан Национал" башкаруучу блоктон алдыда келе жатат.

Айта кетсек, оппозициянын лидери - мурда бийликте 22 жыл туруп Малайзияны гүлдөткөн 93 жаштагы Махатхир Мохамад. Ал 3 жыл мурда бийлик партиясына нааразычылык билдирип, андан чыгып кеткен. Кийин өзүнчө партия түзүп, оппозиция менен биригип бир блок менен шайлоого чыккан. Парламенттик көпчүлүк түзүш үчүн 112 орунду алуу керек.

Оппозиция утса учурдагы премьер Нажиб Разак камалышы мүмкүн. Анткени оппозиция аны казынадан миллиондогон доллар уурдаган, коррупцияга малынган деп айыптап келишет.

Автор: Нургазы Аматов