Бишкекте каратэ боюнча өспүрүмдөр арасында мелдеш өттү

Бишкек шаарында каратэ боюнча жеткинчектер менен өспүрүмдөрдүн арасында мелдеш өттү. Бул тууралуу Жаштар иштери, дене тарбия жана спорт мамлекеттик агенттигинен билдиришти.

Маалыматка ылайык, турнир Кыргыз өлкөсүндөгү шито-рю-каратэ-до федерациясынын 40 жылдыгына карата өткөн. Ага өлкөнүн аймактарынан жана спорттук клубдан 100дөй спортчу катышкан. Мелдеште балдар жаш курак боюнча 5 категорияда күч сынашкан. Ал эми кыздар жаш курагы боюнча 3 категорияда мөөрөй талашкан.

Мелдештин ачылыш аземинде куттуктоо сөзү менен аталган спорттун федерациясынын президенти Александр Долгов, бокс боюнча дүйнөнүн 7 жолку чемпиону Орзубек Назаров жана спортчулардын ата-энелери катышкан.

"Спорт дене булчуңдарына гана эмес, жашоого да оң таасирин тийгизет. Спорт менен машыккан балдар өздөрүн физикалык жана эмоциялык жактан мыкты сезишет. Катышуучуларга ийгилик каалайм", - деген Назаров.

Өз кезинде А.Долгов федерация 40 жыл аралыгында көптөгөн жумуштарды жасаганын айткан: "Федерация өз ишмердүүлүгүн Советтер Союзу учурунда баштап, бүгүнкү күндө да спорттун ушул багытын өнүктүрүнүн үстүндө иштеп келе жатат. Ошондой эле өлкөнүн көптөгөн аймактарында машыгуу үчүн шарттар түзүлдү", - деген ал.

Турнирдин жыйынтыгында жеңүүчүлөр диплом жана баалуу белектер менен сыйлангандыгы жазылат маалыматта.

Автор: Бактыяр Кыдыралиев
Фото: Жаштар иштери, дене тарбия жана спорт мамлекеттик агенттиги.