ЖЫЛНААМА, 20-МАЙ: Испаниянын атактуу дарбазачыларынын бири Икер Касильяс 37 жашка толду

Испания курамасынын мурдагы дарбазачысы, учурда португалиялык "Порту" футболдук клубунун намысын коргогон Икер Касильяс бүгүн 37 жашка толду. Ал 1981-жылы 20-май күнү Мадрид шаарында төрөлгөн.

Икер Касильяс Испаниянын курамында капитан катары чыгып 2008 жана 2012-жылы Европа чемпиондугун, 2010-жылы Дүйнө чемпиондугун уткан. Ал Испаниянын курамында жалпысынан 167 оюнга катышып, курамасы үчүн беттеш өткөргөндөрдүн рекордчусу. Ошондой эле Испания курамынын 73-беттешинде дарбазасына гол өткөрбөй, курамалар арасындагы рекордду койгон.

Ал мадриддик "Реал" клубунун курамында 2000-2015-жылдар аралыгында 15 жыл ойногон. Бул аралыкта Чемпиондор Лигасын 3 жолу, Испания чемпиондугун 5 ирет, Испания кубогун 2 ирет, УЕФАнын супер кубогун 2 жолу жана башка көптөгөн мелдештердин жеңүүчүсү аталган.

Португалиянын "Порту" командасынын курамына 2015-жылы кошулуп, аны менен Португалиянын 2017/18-жылдагы чемпиону болгон. Футбол талаасында жалпысынан 105 оюн өткөргөн.

Мындан сырткары Дүйнөнүн мыкты дарбазачы наамын 5 ирет (2008, 2009, 2010, 2011, 2012) жеңген. УЕФАнын версиясы боюнча жылдын символдук курамасына 6 жолу (2007, 2008, 2009, 2010, 2011, 2012) кирген. Икер Касильяс - капитан катары Дүйнө биринчилигин, Европа чемпионатын жана Чемпиондор лигасын жеңген үч адамдын бири. Ошондой эле 2010-жылы Дүйнө биринчилигин жеңгенден кийин "Алтын мээлей" наамын уткан.

Атактуу футболист 2009-жылдан тарта испаниялык теле алып баруучу Сара Карбонеро менен жолуга баштаган. Алардын сүйүүсү 2010-жылы Түштүк Африкада болгон Дүйнө биринчилигинин финалында стадиондо камералардын коштосунда кумарлануу менен өбүшүүсү элдин эсинде калган. Алар 2014-жылы 3-январда Мартин аттуу уулдуу болушса, 2016-жылдын 2-июнунда Лукас аттуу уулу жарык дүйнөгө келген.

Икер Касильяс 17-май күнү "Порту" клубу менен келишимин дагы бир жылга узартты. Бул болсо 37 жаштагы футболчунун дагы да күчтүү дарбазачы экенин айгинелеп турат.

20-майдын жылнаамасы.

Автор: Бактыяр Кыдыралиев