Таиландда жоголгон 12 футболчу жана машыктыруучусун куткаруу иштери уланууда

Таиландда 12 футболчу бала менен алардын машыктыруучусун куткаруу иштери уланып жатат. Аймактагы жаан-чачынга байланыштуу сууну сордурууга адаттагыдан көп күч жумшалууда. Бул тууралуу чет элдик басылмалар жазышууда.

Кечээ куткаруучулар тарабынан интернетке балдарды куткаруу учурундагы маалымат жарыяланган.

Жергиликтүү маалымат булактары балдардын жанында 1 дарыгер жана 7 куткаруучу бар экенин жазышууда. Учурда балдардын ден соолугу канааттандырарлык экени айтылат. Жалпысынан куткаруу иштерине 1 миңден ашык адам тартылган. Мындан сырткары күн сайын куткаруучулар тобуна башка өлкөдөн барган ыктыярчылар кошулуп жатат.

Эске салсак, үңкүрдөн табылган балдар машыктыруучусу менен 23-июнь күнү Таиланддын Хуахани шаарына жакын жердеги тоого барып үңкүргө киришкен. Ошол учурда жамгыр жаап, үңкүрдүн ичи сууга толуп алар чыга албай камалып калышкан. Жоголгон балдарды издөө иши 24-июнда башталып, бирок эч натыйжа чыккан эмес. Соңку күндөрү издөө жана куткаруу тобуна АКШ, Австралия, Улуу Британия жана Кытайдан келген куткаруучулар дагы кошулган.

Автор: Сталбек Абдижалил уулу