Тоңгон кирпиктери менен белгилүү болгон якутиялык кыз кайрадан көңүл чордонунда

Өзүнүн тоңгон кирпиктери менен интернет мейкиндигинде популярдуулукка жеткен якутиялык Анастасия Груздева кайрадан интернет колдонуучулардын көңүл чордонунда.

Бул ирет Груздева өзүнүн социалдык тармактагы баракчасына бетине чиркейлер конуп турган сүрөтүн жарыялаган. Ал сүрөтүн жүктөп "бул сүрөттүн демөөрчүлөрү бир букет гүл жана чиркейлерге каршы каражаттын жоктугу. Бир саамга токтоп, сүрөткө түшүп же гүл тергиң келеби? Анда чиркейлерди бекер тамактандыр" деген билдирүү менен коштогон.

Груздеванын бул сүрөтүн интернет колдонуучулар кызуу талкууга алышып, ар кандай ойлорун билдиришкен. Бири бул жөн гана өзүнө көңүл бурдуруу экенин айтса, экинчиси анын ушунча чиркейди кондуруп алып чыдап турганына таң берген.

"Сүрөт талаада гүл терип жүргөнүмдө тартылган. Биз күтүүсүздөн талаага чыгып кеткендиктен эч ким өзү менен кошо чиркейлерге каршы каражатты алган эмес. Мен болгону бир нече секунд турсам чиркейлер конуп алды. Бул сүрөттү жүктөп жатканда эч кандай пиар тууралуу ойлонгон эмесмин. Ал эми кышында тартылган сүрөт менен салыштырууну курбу кызым жүктөп коюптур", - деп билдирген Груздева.

Ошондой эле Груздева чиркейлер аны көп деле чакпаганын, бирок мындай абалда көпкө туруу мүмкүн болбогонун кошумчалаган.

Айта кетсек, Орусиянын Якутск шаарынын 24 жаштагы тургуну Анастасия Груздеванын кыш мезгилиндеги социалдык тармактардын бирине жүктөгөн сүрөтү тез арада популярдуулукка ээ болуп, коомчулуктун кызуу талкуусун жараткан.

Автор: Айзада Тураркулова