Таиландда үңкүргө камалып калган 12 окуучу жана машыктыруучу куткарылды

Таиландда үңкүргө камалып калган 12 окуучу жана машыктыруучу куткарылды. Бул тууралуу чет элдик маалымат каражаттары жазып чыгышты.

Белгилүү болгондой, куткаруучу топ акыркы 12-окуучуну жана машыктыруучуну Кхао Луанг үңкүрүнөн алып чыгышты. Алар Бишкек убактысы боюнча саат 16:43тө чыгышкан. Акыркы болуп чыккан футболчу жана машыктыруучу Эк учурда талаа госпиталына багыт алышты. Дарыгерлердин айтымында, балдардын абалы канааттандырарлык.

Айта кетсек, 23-июнь күнү 12 окуучу машыктыруучусу менен бирге Таиланддын Хуахани шаарына жакын жердеги тоого барып үңкүргө киришкен. Ошол учурда жамгыр жаап, үңкүрдүн ичи сууга толуп, алар чыга албай камалып калышкан. Жоголгон балдарды издөө иши 24-июнда башталып, бирок эч натыйжа чыккан эмес. Аларды арадан 9 күн өткөндөн кийин табышкан.

Балдарды куткаруу учурунда куткаруучу топтун мүчөсү болгон 1 суучул каза болгон. Маалыматтар боюнча ал абанын жетишсиздигинен улам көз жумган.

Автор: Айзада Тураркулова