Америкалык "Billboard" журналы эң көп каражат тапкан дүйнөлүк музыканттарды аныктады

Америкалык "Billboard" журналы эң көп каражат тапкан дүйнөлүк музыканттарды аныктады. Бул тууралуу батыш маалымат булактары жазып чыкты.

Тизменин сап башында ирландиялык "U2" тобу жайгашкан. Аталган топ өткөн жылы 54 миллион 400 миң доллар тапкан. Бул сумманын 52 миллиону гастролдон түшкөн. Андан кийинки саптан бир жыл ичинде 52 миллион 200 миң доллар тапкан америкалык кантри ырчысы Гарт Брукс орун алган. Ал эми үчүнчү орунда 43 миллион 200 миң доллар тапкан "Metallica" тобу жайгашкан. Бирок бул топ ырларынын сатылышы боюнча алдыңкы орунду ээлеген.

Эң көп киреше тапкан 50 музыканттардын катарына ырчы, аткаруучу Бруно Марс (40 миллион 700 миң доллар), британиялык ырчы Эд Ширан (31 миллион 300 миң доллар), америкалык ырчы Леди Гага (29 миң 700 доллар), Билли Жоэл (29 миллион 200 миң доллар) жана башкалар кирген.

Ырчылардын көпчүлүгү кирешени гастролдон тапкан. Бирок гастролдук турнеге чыкпай эле музыкалык альбомун сатуудан эң көп киреше тапкандар дагы бар. Алар канадалык рэпер Дрейк (8 миллион 600 миң доллар) жана америкалык ырчы Тейлор Свифт (альбомун сатуудан 5 миллион доллар).

Автор: Бактыгүл Момбекова