Белгилүү орусиялык "Дом-2" реалити-шоусу тартылган жерде жол салынат

Катышуучулар чогулуп маселелерди талкулоочу "лобное место" деген жай.

Тартуу иштери жүрүп жаткан аймактын асмандан көрүнүшү.

Белгилүү орусиялык "Дом-2" реалити-шоусу тартылган жерде жол салынат. Бул тууралуу орусиялык басылмалар жазышууда.

Белгилүү болгондой, "Дом-2" долбоору ТНТ каналында 14 жылдан бери эфирге чыгып келет. Тартуу иштери жүргөн негизги "Поляна" аймагы Москва шаарына жакын жайгашкан. Аянты 3 гектарга жакын жер 2014-жылы сатылып алынган.

Маалыматка ылайык, жакынкы арада "Полянада" тартуу иштерин жүргүзүү мүмкүн болбой калат. Анткени Москванын бийлиги Саларьеводон Марьино айылына чейин унаа магистралын салууну көздөөдө. Бул жол шоуну тартуу иштери жүрүп жаткан аймактан өтөт. Тактап айтканда, долбоордун катышуучулары ар кандай маселелерди талкуулап, реалити-шоудон ким кетерин чечкен "лобное место" деп аталган жерден өтөт.

Мындай чечим 2018-жылдын башында кабыл алынган. ТНТ каналынын пиар директору бул тууралуу кандайдыр бир комментарий берүүдөн баш тарткан. Ал эми тартуу иштерин жүргүзүп жаткан топ азыр эле бактардын кыйылып жаткан үндөрү угулуп, тартуу иштерине тоскоолдук жаралып баштаганын билдирген.

Автор: Айзада Тураркулова