Жогорку Кеңеш Бишкектеги кароосуз калган балдарды калыбына келтирүү борборунун тарбиялануучулары үчүн Ысык-Көлдө жайкы эс алуу уюштурду

Жогорку Кеңеш Бишкек шаарындагы кароосуз калган балдарды калыбына келтирүү борборунун тарбиялануучулары үчүн ЖКнын Ысык-Көлдөгү “Алтын-Көл” пансионатына жайкы эс алуу уюштуруп берди. Кароосуз калган балдарды калыбына келтирүү борборунун директору Алексей Петрушевский балдарга Ысык-Көл жээгинде эс алуу мүмкүнчүлүгү түзүлгөндүгүнө ыраазычылыгын билдирди. Анын билдиргенине караганда, “Алтын-Көл” пансионатына аталган борбордун 28 тарбиялануучусу 3 тарбиячысы менен кошо эс алышкан. Төрага Асылбек Жээнбеков үстүбүздөгү жылдын 31-майында жогоруда аталган борборго барган. Анда тарбияланып жаткан балдар менен баарлашууда Ысык-Көлдө жайкы эс алуу уюштуруп берүүгө убада кылган. Белгилей кетсек, бул борбор 2003-жылдан бери иштейт. Андан бери 1148 балага (алардын 464ү кыз бала, 684 эркек бала) жардам көрсөтүлүп, алардын 208и мектептерге, 86сы лицейлерге киргизилген. Бүгүнкү күндө борбордо 70 бала (23 кыз, 47 бала) тарбияланууда.

Автор: Ширин Жумадилова