Криштиану Роналду "Ювентус" үчүн алгачкы голун киргизип, 2-таймда башка оюнчуга алмаштырылды

Португалиялык футболчу Криштиану Роналду "Ювентус" футболдук клубу үчүн алгачкы голун киргизди.

Маалыматтарга таянсак, 12-августта Италиянын Вилар-Пирозе шаарында "Ювентустун" негизги жана жаштар курамасынын ортосунда салтка айланып калган жолдоштук беттеш орун алган. Роналду негизги курамда оюн талаасына чыгып, 8-мүнөттө эсеп санын ачканга жетишти.

Бул оюнда "Ювентустун" негизги курамы жаштар курамасын 5:0 эсебинде уткан. Ал эми Роналду 2-таймда башка оюнчуга алмаштырылган. Алдын ала маалыматтарга караганда, Криштиану Роналдунун алгачкы расмий оюну 18-августта Италиянын биринчилигинин алкагында "Кьево" клубу менен болмокчу.

Айта кетсек, Роналду ушул жылдын июль айында испаниялык "Реал Мадрид" клубунан италиялык "Ювентуска" өткөн. Бул трансфер 112 миллион еврого бааланган. Ошондой эле Роналду жылына 30 миллион евро маяна алып турмакчы.