Жайкы Азия оюндары: Футбол боюнча Кыргыз олимпиадалык курамасы Түштүк Кореяга жеңилип, мелдештен четтеп калды

Бүгүн, 20-августта Индонезияда өтүп жаткан Жайкы Азия оюндарынын алкагында футбол боюнча Кыргыз олимпиадалык курама командасы Түштүк Корея курамасы менен беттешип жеңилип калды.

Индонезиянын Жакарта жана Палембанг шаарларында өтүп жаткан Жайкы Азия оюндарынын футбол боюнча мелдешинде Кыргыз курама командасы тайпалык баскычтын 3-турунда Түштүк Корея курамасына каршы ойноду.

Беттештин алгачкы мүнөттөрүндө түштүк кореялык футболчулар чабуулга чыгып, Калыс Акималиевдин дарбазасында кооптуу абалдарды жаратып жатышты. 2-таймдын 63-мүнөтүндө түштүк кореялыктардын чабуулу гол менен аяктады. Анда англиялык "Тоттенхэм" футболдук клубунда ойногон Сон Хын Мин айырмаланып эсепти 1:0 кылды.

Муну менен беттешин соңуна чейин эсеп саны өзгөрбөй, беттеш 1:0 эсеби менен аяктады.

Түштүк Корея курамасы "Е" тайпасында 2 беттеште жеңишке жетип, 1 жолу жеңилүү ызасын тартып 6 упай менен плей-офф баскычына жолдомо алды. Ал эми Кыргыз курамасы мелдештен четтеди.

Автор: Нурсултан Нурболот уулу