Мээрим Жуманазарова: "Улуулар менен күрөшүү оорураак, алар абдан күчтүү болушат"

24-августта Индонезиядагы Жайкы Азия оюндарына катышып ийгилик жараткан балбандар кайтып келишти.

Анда кыз-келиндер арасындагы мелдеште коло медалды тагынган Мээрим Жуманазарова SUPER.KG порталына мелдеш тууралуу айтып берди.

"Мелдеш аябай жакшы деңгээлде өттү. Үчүнчү беттешимде, тилекке каршы, кытайлык атаандашыма жеңилип калдым. Жана 3-орун үчүн беттеште япониялык балбан менен күч сынашып, аны утуп коло медалга ээ болдум", - дейт ал.

Ошондой эле Мээрим Жуманазарова атаандаштары тууралуу жана жаштар менен улуулар арасындагы күрөштүн айырмасы тууралуу айтып берди.

"Мелдешке ар бир өлкөнүн мыкты даярданган спортчулары келди. Ар бир беттеш мен үчүн оор болуп, колумдан келген күч-аракетимди жумшап колого татыдым. Жаштар арасындагы мелдеш менен улуулар арасындагы күрөштүн айырмасы өтө чоң. Жаштар арасында күрөшкөндө бизге кадимкидей эле жеңил сезилет. Ал эми улуулар менен күрөшүү биз үчүн оорураак, алар абдан күчтүү болушат" - деген пикири менен бөлүштү балбан.

Эске салсак, Мээрим Жуманазарова Жайкы Азия оюндарында коло медаль үчүн күрөшүп, япониялык Аяна Гемпей менен кез келип, 7:3 эсебинде жеңишке жеткен.