Көк бөрү боюнча Өзбекстандын курама командасы Казакстандын курамасын утуп финалга чыкты

Бүгүн, 6-сентябрда Ысык-Көл облусунун Бактуу-Долоноту айылындагы борбордук ат майданда Дүйнөлүк көчмөндөр оюндарынын алкагындагы көк бөрү боюнча мелдештин жарым финалдык беттештери орун алууда.

Учурда оюн талаасына "С" тайпасынан Казакстан курама командасы жана "D" тайпасынан Өзбекстан курама командасы чыкты.

Буга чейин "А" тайпасынан Кыргыз курама командасы, "В" тайпасынан Москва курама командасы беттешип, 23:6 эсебинде Кыргыз курамасы финалга чыккан.

18:17. Казакстан менен Өзбекстандын көк бөрүчүлөрүнүн беттеши уланууда. Казак улакчылары атаандаштарынын тай казанына бир улак таштап, эсеп ачылды.

18:23. Эсеп 1:1. Өзбек улакчылар мүмкүнчүлүккө ээ болуп, эсеп санын тең кылганга үлгүрүштү.

18:25. Кыл чайнашкан беттеш орун алууда. Өзбекстан курамасынын тай казанында казак менен өзбек улакчылар бир топ убакыт күч сынашты. Аягында казак көк бөрүчүлөр бир улак таштап мыкты болушту. Оюндун биринчи бөлүгү 2:1 эсеби менен жыйынтыкталды.

18:35. Беттештин экинчи бөлүгү башталды. Азырынча Казакстандын командасы 2:1 эсеби менен алдыда. Оюн башталары менен өзбек улакчысы улакка ээлик кылды, бирок ийгиликтүү ишке ашыра албай калды.

18:41. Казак курамасынын улакчысы орой оюн көрсөтүкөнү үчүн 2 мүнөткө жазаланды.

18:42. Өзбек оюнчулары улакка ээлик кылып эсепти теңеп алууга жетишти. Эсеп 2:2.

18:44. Өзбек оюнчуларынын таштаган улагын калыс эсепке алган жок. Жыйынтыгында эсеп 2:1 бойдон калды. Жекеме-жеке чыгууда өзбек улакчысы улакты кайрадан илип кетип, эсепти кайрадан теңеп алууга жетишти.

18:47. Өзбек улакчылары кайрадан ийгиликтүү чабуул жасап эсепти 3:2 кылууга жетишти.

18:48. Казак оюнчулары атаандаштарынын тай казанына улак таштап, эсепти 3:3кө айландыра алышты.

18:55. Беттештин экинчи бөлүгү аягына чыкты. Эсеп азырынча 3:3 бойдон калууда.

19:09. Беттештин үчүнчү бөлүгү башталды. Дароо эле өзбек оюнчулары улакты илип кетип эсепти 4:3 кылганга жетишти. Казак улакчылары улак таштоого тоскоолдук кыла алышкан жок.

19:14. Өзбек улакчылары кайрадан активдүүлүк көрсөтүп, эсепти 5:3кө айландырып коюшту.

19:18. Казак оюнчуларынын улак таштоосуна атаандаш команда мүмкүнчүлүк бербей, тай казандын жанынан чийинден сыртка сүрүп чыгарып салды.

19:20. Өзбек улакчысы эреже бузуп, 2 мүнөттүк жаза алды. Азырынча өзбек улакчылары алдыда.

19:23. 2 мүнөткө жазаланган өзбек улакчысы кайрадан оюн талаасына чыгып, толук курам менен ойноп жатышат.

19:27. Казакстан менен Өзбекстандын көк бөрү боюнча командаларынын беттеши аягына чыкты. Эсеп 5:4. Жыйынтыгында Өзбекстандын командасы финалга чыкты. Эртең, 7-сентябрда Кыргыз курамасы менен финалда беттешмекчи. Ал эми Казакстандын командасы Москва командасы менен коло медаль үчүн күч сынашат.