Диего Марадона мексикалык клубга машыктыруучу болду

Легендарлуу аргентиналык футболчу Диего Марадона мексикалык "Дорадос де Синалоа" футболдук клубуна башкы машыктыруучу болуп дайындалды. Бул тууралуу клубдун социалдык тармактагы расмий баракчасына жарыяланды.

Белгилүү болгондой, клуб 2-дивизиондо ойнойт. Өтүп жаткан биринчиликте 6 оюндан кийин 13-орунда турат. Эске салсак, Марадона машыктыруучу болуп иштеген акыркы жери БАЭнин "Аль-Фуджайра" клубу болгон, ал жактан мурдагы футболчу апрель айында кеткен. Андан соң Марадона бресттик "Динамо" клубунун башкаруусунун жетекчиси болгон.

Диего Марадона - белгилүү аргентиналык футболчу. Ал карьерасында "Бука Хуниорс", "Барселона", "Наполи", "Севилья", "Ньюэллс Олд Бойз" клубдарында ойногон. 1986-жылы Мексикадагы Дүйнө чемпиондугунда Аргентина курамасы менен биргеликте алтын медаль тагынган. Аргентинанын курамында ал 91 оюнга чыгып, 31 гол киргизген. Кийин телекомментатор, машыктыруучу болуп иштеп, тасмаларга да тартылганга үлгүргөн.

Автор: Айзада Тураркулова