Конор Макгрегор менен Хабиб Нурмагомедовдун беттешинде күтүүсүз жагдайлар чыгышы эске алынып, запаска дагы бир мушкер дайындалды

Конор Макгрегор менен Хабиб Нурмагомедовдун беттешинде үчүнчү мушкер катары запаста америкалык мушкер Тони Фергюсон турат. Бул маалыматты 4-октябрда UFC уюмунун президенти Дэйна Уайт эки мушкердин беттеши алдындагы маалымат жыйында билдирди.

"Эмне болорун көрөбүз. Алгач мушкерлер салмактарын ченөө үчүн таразага түшүүлөрү керек. Эгер жагдай башкача болуп калса же бир нерсе болсо, Тони Фергюсон запаста турат", - деди Дэйна Уайт.

Ирландиялык мушкер Конор Макгрегор кечээ уюштурулган маалымат жыйынга кечигип келди. Буга ачууланган Хабиб Нурмагомедов 15 мүнөт күткөндөн кийин жыйын өтчү залдан кетип калды.

"Мен Конорду ойлоп отурбайм. Менин убактым чектелген жана ар бир сааты пландалган. Маалымат жыйын эчак башталган. Эгер кимдир бирөө кечигип жатса, бул анын жеке маселеси", - деди Нурмагомедов.

"UFC 229" мелдеши 6-октябрда Лас-Вегаста орун алат. Нурмагомедов менен Макгрегордун беттеши Бишкек убактысы боюнча 7-октябрда саат 9:00 чамаларында башталмакчы. Бул беттеште Хабиб Нурмагомедовду жеңил салмак категориясындагы чемпион титулун коргоо күтүп жатат. Анын эсебинде 26 жеңиш бар, бир да жолу жеңилген эмес. Ал эми Макгрегор карьерасында 21 ирет жеңип, 3 ирет жеңилүү ызасын тарткан.

Кошумчалап кетчү жагдай, Хабиб Нурмагомедовдун 1 күндөн кийинки күтүлүп жаткан беттеште запаска коюлган мушкер Тони Фергюсон менен 4 ирет октагонго чыгуусу пландалып, бирок ишке ашкан эмес. Эки мушкердин улам бири жаракат алып жатып буга чейинки 3 беттеш токтотулган. Бир жолкусунда Нурмагомедов булчуңдарын чыңдоо максатында "салмак кууп" жатып ооруканага түшүп калган.

Автор: Гүлжан Асанкожоева