Күрөш боюнча Дүйнө чемпиондугу: Кыз-келиндер арасындагы күрөштө Кыргыз өлкөсүнүн намысын Мээрим Жуманазарова жана Айпери Медет кызы коргойт

Күрөш боюнча Дүйнө чемпиондугунда Кыргыз өлкөсүнүн намысын коргой турчу балбан кыздар белгилүү болду. Бул тууралуу Күрөш федерациясынан билдиришти.

Маалыматка ылайык, Венгриянын Будапешт шаарында 20-октябрда күрөш боюнча Дүйнө чемпиондугу старт алат.

Кыз-келиндер арасындагы күрөштө жалпы 10 медалдар топтому ойнотулат. Кыргыз өлкөсүнүн намысын 2 балбан кыз коргойт. Алар Айпери Медет кызы жана Мээрим Жуманазарова. Эки балбан тең 2017-жылы Парижде өткөн Дүйнө чемпиондугуна катышып, 10-13-орунду ээлешкен.

Кыз-келиндер арасындагы күрөш 22-25-октябрь аралыгында өтөт. Кыргыз өлкөсүнүн курамы:

68 килограммга чейинки салмак ченинде - Мээрим Жуманазарова;

76 килограммга чейинки салмак ченинде - Айпери Медет кызы;

Башкы машыктыруучу - Нурбек Изабеков;

Калыс - Мейрамбек Ахметов.

Автор: Айзада Тураркулова