Аптанын башында Ички иштер министрлиги Москва шаарында Кыргыз жарандарынан опузалап акча жана алардын документтерин тартып алып жүргөн кылмыштуу топ кармалды деп маалымат тараткан. Кылмыштуу топ колго түшүрүлүп, алар отурган кеңседен 54 даана айдоочулук күбөлүк, Кыргыз жарандарына таандык 35 даана паспорт, 3 аскердик билет, 10 миң рубль, жана пневматикалык тапанча табылган. Бүгүн, 17-октябрда SUPER.KG порталына кылмышка шектүү катары кармалгандардын бири Аскар Абдилманап уулунун эжеси кайрылып, окуя тууралуу өзүнүн версиясын айтып берди.
“Бир тууган инимди кылмыштуу топтун мүчөсү деп элге жарыялап, ИИМ анын сүрөттөрүн кылмышкер деп таратканы акылга сыйбаган нерсе болду. Мындай кадамга барууга эмне түрткү болгонун азыр да түшүнө албай жатам. Иним Аскар Абдилманап уулу жана анын досу Мадияр Касымбеков Москва шаарында таксопарк иштетип эмгектенишет. Ал жакта көптөгөн кыргыз жарандары иштеп жан багышат. Бирок арасында карызга батып, кийин андан кантип кутулаарын билбей калганда “акча талап кылды” деп алардын үстүнөн арыздангандар да бар", - дейт кылмышка шектелип жаткандын тууганы.
Кылмыштуу топтун мүчөсү делген Аскардын эжесинин айтымында, анын үстүнөн ИИМдин Москвадагы өкүлчүлүгүнө арыз жазган адам буга чейин таксопаркта унааны ижарага алып иштеп келген.
"Иним жана анын досунун үстүнөн “акча талап кылды” деп ИИМдин Москвадагы өкүлчүлүгүнө Канат деген таксист арыз жазган экен. Ал буга чейин таксопарктан ижарага унаа алып иштечү. Бүгүнкү күндө менин билишимче анын таксопаркка 30 миң рубль карызы бар. Ижарага унаа алган таксисттер күнүнө 1 миң 600 рубль акы төлөйт. Ал аны төлөй албай калып, ушундай жол менен "айласын" табам деген экен.
Ал өзүнүн 1 миң 600 доллар акчасын Аскар менен Мадияр алып койду деп арызданган. Бирок суракка алынган күбөлөр анын мындай суммадага акчасы болбогонун билдиришкен. Анын үстүнө ал жигит Бишкектеги досунан ири суммадагы акчаны карызга алып качып жүргөндүгүн аныктадык. Кылмыштуу топтун мүчөлөрү кармалды деп кеңседе отурган кызматкерлердин баары кармалган. Бирок кийин далилдер жетишпегендиктен алар коё берилген", - деп кошумчалады кылмышка шектелгендин эжеси.
Ал эми кармалгандардын жанынан табылган паспорт, айдоочулук күбөлүктөр таксопарктын жетекчилигине тиешелүү болгону аныкталганын кошумчалады.
"Кеңседен табылган документтерге инимдин жана досунун тиешеси жок. Ал ишкананын Бакыт атуу жетекчисине тийиштүү, ал эми акчалар боюнча айтсам, ал унаалар үчүн төлөнгөн ижара акылары экенин билем", - дейт Аскардын эжеси.
Ички иштер министрлигинин басма сөз кызматы 15-октябрда Москвада кылмыштуу топ кармалганын жана алар өздөрүн криминалдык авторитеттин жана уюшкан кылмыштуу топтун лидерлеринин атынан кылмыш иштерин жасап жүрүшкөнүн жарыялаган. Маалыматта жабырлануучулар кылмыштуу топтун жасаган иштерине карата арыз жазуудан баш тартып келишкенин жана аларга түшүндүрүү иштери жүргүзүлгөндүгүн белгилешкен. Анда "28-июлда топтолгон маалыматтар боюнча Москва шаарынын Нагорный районунда кылмыш иши козголгон. Ыкчам-иликтөө иштеринин негизинде кылмыштуу топтун арасында 8 Кыргыз жараны бар экени аныкталып, аларды кармоо иш-аракети жүргүзүлгөн. Анын жыйынтыгында кармалган жарандардын арасында Жалал-Абад облусунун Токтогул районунда 1992-жылы туулган Мадияр Касымбеков менен Сузак районунда 1993-жылы туулган Аскар Абдилманап уулу бар болгон. Алар "мыйзамдагы ууру" К.К.нын атын пайдаланып, ири өлчөмдөгү акчаларды жарандардан талап кылып келишкен.
