Күрөш боюнча Дүйнө чемпиондугу: Балбан Айпери Медет кызы алгачкы беттешинде жеңилип калды

Бүгүн, 23-октябрда Венгриянын Будапешт шаарында өтүп жаткан күрөш боюнча Дүйнө чемпиондугунун 4-мелдеш күнү өтүүдө. Анда кыз-келиндер арасындагы мелдеште Кыргыз өлкөсүнөн килем үстүнө Айпери Медет кызы чыкты.

Айпери Медет кызы 76 килограммга чейинки салмак ченинде күрөшүп, алгачкы беттешинде 1/16 финалда кытайлык Палиха Палиха менен кездешти. Беттештин жүрүшүндө Айпери Медет кызы алгачкы болуп 1 упайга ээ болуп, андан соң кыймыл жасабай 2 упай атаандашына ыйгарылып калды. Мындан улам Айпери Медет кызы упай алганга жетишпей калып, 1:2 эсеби менен кытайлык балбан жеңишке жетти.

Муну менен Палиха Палиха жарым чейрек финалга өтүп, ал финалга чыкса Айпери Медет кызы көңүл жубатуучу раундда күч сынашканга мүмкүнчүлүк алат.

Автор: Нурсултан Нурболот уулу