Бишкекте белгисиз адам тарабынан сабалган абышканын сан сөөгү сынган. Наркозду көтөрө алса ага операция жасалат

Бишкектеги Жибек Жолу жана Логвиненко көчөлөрүнүн кесилишинде баратып ур-токмокко кабылган 90 жаштагы абышканын сан сөөгү сынып кеткен. Тиешелүү анализдерден кийин, эгер анын жүрөгү наркозду көтөрө алса, ага операция жасалат. Бул тууралуу бүгүн, 9-ноябрда SUPER.KG'ге Травматология жана ортопедия илим-изилдөө институтунун башкы дарыгери Алмаз Кубатбеков кабарлады. Анын айтымында, бейтаптын абалы учурда канааттандырарлык.

1929-жылы туулган Г. Николай ооруканага 7-ноябрь күнү саат 16:25 чамасында "Тез жардам" аркылуу алып келинген.

"Учурда бейтаптын абалы канааттандырарлык, тиешелүү медициналык жардам көрсөтүлүп жатат. Катуу кулагандан оң бутунун сан сөөгү сынып кеткен. Учурда тиешелүү анализдерди тапшырып жатат. 4 күндүн ичинде анын жүрөгү текшерилет. Эгер анализдери жакшы чыгып, жүрөгү наркозду көтөрө турганын аныктасак бутуна операция жасайбыз. Жүрөгү көтөрө албаса анда, башка жолдорун издөөгө туура келет", - деди Кубатбеков.

Бишкекте 90 жаштагы абышканы сабап, окуя болгон жерден из жашырып кеткенге шектелген адам кармалып, Бишкек ШИИББинин убактылуу кармоочу жайына камакка алынган.

Автор: Мальвина Уметбекова