Күрөш боюнча жаштар арасындагы Дүйнө чемпиондугу: Исламбек Орозбеков алгачкы беттешинде жеңилип калды

Бүгүн, 16-ноябрда Румыниянын Бухарест шаарында эркин күрөш боюнча жаштар арасындагы (U-23) Дүйнө чемпиондугу өтүүдө. Анда балбандар 5 салмак ченинде күч сынашып жатат.

70 килограммга чейинки салмак ченинде Кыргыз өлкөсүнөн Исламбек Орозбеков килем үстүнө чыкты. Ал алгачкы беттешинде 1/16 финалдын алкагында молдовалык Стефан Тону менен кездешти. Беттештин 1-бөлүгүндө Тону 6:0 эсеби менен утуп жаткан, 2-бөлүктө Орозбеков өзүнүн эсебине 5 упай жазганга жетишти.

Муну менен беттеш 6:5 эсебинде аяктап, Стефан Тону жеңишке жетти. Ал финалдык бөлүккө чейин жетсе Исламбек Орозбеков көңүл жубатуучу беттеште күч сынашканга мүмкүнчүлүк алат.

Автор: Нурсултан Нурболот уулу