Балыкчыда катуу шамал социалдык объекттердин жана турак үйлөрдүн чатырларын учуруп кетти (сүрөт)

Балыкчы шаарында катуу шамал социалдык объекттердин жана турак үйлөрдүн чатырларын учуруп кетти. Бул тууралуу Өзгөчө кырдаалдар министрлигинин басма сөз кызматы кабарлады.

Маалым болгондой, 24-ноябрь күнү саат 23:00 чамасында шаарда ылдамдыгы секундасына 24-28 метрге жеткен шамал катталган. Шамал Лев Толстой атындагы орто мектептин 60 чарчы метр чатырын, Жоомарт Бөкөнбаев атындагы орто мектебинин складынын 7 чарчы метр чатырын, 2 турак үйдүн 230 чарчы метр чатырын жана башка бир нече имараттардын чатырларын учурган. Адам өмүрүнө зыян келтирилген эмес.

Учурда Жарандык коргонуу комиссиясы тарабынан тактоо жана түшүндүрүү иш-чаралары жүргүзүлүп, келтирилген материалдык чыгымдын көлөмү такталып жатат.

Автор: Жамалидин Парманкулов